Quarto Giorno
Rappresentazione su tela 50x70 di Mimmo Ganci Chiodo (Quarto giorno)
In mostra presso la Pro-Loco di Alimena
Testo
Chistu avvisu già in sintiri
di Maria lu spusu amatu,
sti paroli misi a diri,
tuttu quantu infervuratu:
«L'ora è tarda chi facemu?
Spusa cara, via, partemu».
Maria Vergini ubbidienti
a cavaddu si mittiu,
lu so cori a Diu offrennu,
dannu gustu a lu so' Diu.
S. Giuseppi camminava
e la riitina tirava.
Diecimila Serafini
onuraru l'equipaggiu
a sti Santi pilligrini
ntrà stu poviru viaggio,
ralligrannu pri la via
a Giuseppi e a Maria.
Foru sempri scanusciuti
di li genti disprizzati
da Diu sulu benvuluti.
e di l’angili onurati.
Nun si curanu di peni
mentri Diu li voli beni.
Mudistedda e rispittusa
viaggiava la Signura.
Quantu è bedda e amurusa
virginedda e matri pura!
Ogni cori incantava
di cui a casu la guardava.
Ben cumposta nell'esternu
risplinnia lu so' canduri
riflittia ntrà lu so' nternu
di Gesù lu grandi amuri.
E ntrà tuttu lu camminu
ja pinsannu a Diu Bambinu.
Quanti lacrimi d'affettu
di l'ucchiuzzi ed scapparu!
Quanti fiammi ntrà lu pettu,
miditannu s'addumaru!
Ja chiancennu ca scupria
ca so' fìgghiu Diu patìa.
Pri la strafa si 'ncuntrava
cu diversi piccatura,
e cu sguardu ca ed dava
cunvirtiva li cori duri!
«Pri pietà, Maria, viditimi
sugnu malu, cunvirtitimi».
A l'afflittu chi vidia
cu pietà li cunsulava.
Pri l'infermi ca scupria
tutt'affettu a Diu prigava.
«Ji sugnu poviru, o Maria,
pietà ddi l'anima mia».